Ekzistojnë pak gjëra në jetë që ngjallin të njëjtat ndjenja siç është kur shihni një kamion të Carvago teksa largohet pasi shoferi sapo ka shkarkuar veturën tuaj të re në oborrin tuaj. Por që ky gëzim të zgjatë sa më shumë, duhet të kujdeseni mirë për veturën tuaj. Ndjekja e planit të shërbimeve që rekomandon prodhuesi mund të mos jetë gjithnjë e mjaftueshëme.
Prodhuesit e makinave e “optimizojnë” planin e shërbimeve për të reduktuar TCO (Total Cost of Ownership, ose koston totale të zotërimit), i cili është një parametër që shihet me kujdes nga klientët që blejnë veturame shumicë. Kompanitë e marrjes dhe dhënies me qira të veturave zakonisht i ndërrojnë veturat pas dy ose tri vitesh dhe pas 20 deri në 60 mijë kilometrash, ndaj ata nuk janë shumë të interesuar për jetëgjatësinë e veturave të tyre në aspektin afatgjatë. Krejt ndryshe nga shumë prej jush, që i blini si makina të përdorura.
Nëse doni që vetura juaj t’ju shërbejë mirë dhe për kohë të gjatë, rekomandojmë të bëni shërbimet e mëposhtme pavarësisht planit të shërbimeve.
Ndërroni vajin në motor çdo 15 mijë kilometra ose një herë në vit
Vaji është gjaku i motorit të makinës suaj. Jo vetëm që e lubrifikon, por edhe ndihmon për ta mbajtur të ftohtë dhe për ta pastruar, e madje funksionon si një lloj izoluesi. Por vaji i humbet vetitë lubrifikuese me kalimin e kohës për shkak të proceseve kimike dhe ndotjes prej karburantit, depozitimeve të karbonit dhe grimcave të vogla prej gërryerjes. Kombinimi i motorëve modernë me injeksion direkt me udhëtimet në distanca të shkurtra i përshpejton këto procese negative. Që të jeni të qetë, duhet ta ndërroni vajin çdo 15 mijë kilometra ose të paktën një herë në vit, edhe nëse te plani i shërbimeve thuhet se intervali mund të jetë dyfish. Në rastin e veturave me të ashtuquajtur interval të ndryshueshëm, i cili ndjek vetë cilësinë e vajit, ndiqni rekomandimet e treguesit në sistemin e njoftimeve. Nëse përdorni shërbimet e një servisi të pavarur, sigurohuni që mekaniku të përdorë vaj me të njëjtat parametra që rekomandon prodhuesi për makinën tuaj. Motorët e sotëm mund të jenë shumë të ndjeshëm ndaj kësaj.
Ndërrojeni vajin në transmisionin automatik çdo 60 deri në 120 mijë kilometra ose çdo gjashtë vjet
Lajmi i mirë është se vaji në një transmision automatik zgjat dyfish më shumë se ai në motor. Lajmi i keq është se jetëgjatësia vazhdon të jetë e kufizuar, edhe pse prodhuesi mund të pretendojë që vaji në veturë zgjat për gjithë jetën. Në veçanti, transmisionet me dopio freksion janë shumë të ndjeshëm ndaj cilësisë së vajit – sidomos nëse përdorin fraksion të thatë (një model tipik është kutia DQ200, që gjendet në veturat me motor të vogël të prodhuara nga grupi VW).E njëjta gjë mund të zbatohet edhe për fraksionet e njoma, si për shembull PowerShift nga Ford. Në këtë rast nuk mund të përcaktojmë me siguri një interval të përgjithshëm të rekomanduar për ndërrimin e vajit. Disa transmisione automatike kanë nevojë për vaj të ri çdo 60 mijë kilometra që të funksionojnë siç duhet, për disa të tjera mund të jetë dyfish ose më shumë. Kërkoni këshillat e një servisi të besuar. Edhe një servis i pavarur bën punë, me kusht që të jetë i specializuar në markën e veturës suaj ose drejtpërejt në transmisionet automatike.
Ndërrojeni vajin në sistemin 4×4 çdo 120 mijë kilometra
Shumë klientë sot kërkojnë një “katër herë katër”(4×4), por disa nuk duan të paguajnë kostot më të larta të shërbimeve. Si pasojë, e shpërfillin qëllimisht vajin në sistemin katër herë katër. Shumë veta që blejnë vetura të përdorura me shumë kilometra bllokohen duke xhiruar rrotat përpara në parkingun e mbuluar me borë të një resorti për ski, ngaqë llumi i zi në bashkuesin e inter-aksit prej kohësh as që nuk ngjan më si vaj. Nëse prodhuesi rekomandon një interval për ndërrimin e vajit, është mirë ta zbatoni. Por nëse ky interval nuk ekziston në planin e shërbimeve, e cila nuk është diçka e pazakontë, rekomandojmë që ta ndërroni çdo 120 mijë kilometra.
Pastroni frenat pas çdo dy sezonesh të ndërrimit të gomave
Një punë e thjeshtë që kërkon vetëm pak çaste nga koha e mekanikut dhe që do të ketë ndikim shumë të vogël te kostoja e shërbimeve – e megjithatë është zhdukur plotësisht nga planet e shërbimeve të disa modeleve. Fatmirësisht ka shumë pak gjasa që frenat të cilat nuk janë pastruar prej kohësh të mos jenë në gjendje ta ndalojnë veturën. Por ato bëjnë zhurma të ndryshme, mund të frenojnë në mënyrë jo të njëtrajtshme dhe sigurisht që ndikojnë negativisht në jetëgjatësinë e frenave. Çmontoni, pastroni dhe lubrifikoni një herë në vit. Kalimi nga gomat e verës në gomat e dimrit është mundësia idela, pjesërisht ngaqë shumë servise gomash ofrojnë shërbime për frenat, ndaj mund t’i bëni të gjitha në një vend.
Bëni konvergjencën çdo dy vjet
Këmba, këndi i incidencës, këndi i kamberit… Mbase nuk i dini se çfarë nënkuptojnë këto vlera. Por duhet të dini se nëse nuk janë brenda limiteve të rekomanduara nga prodhuesi, ato mund të shkaktojnë mungesë stabiliteti të veturës, mund të rritin konsumin e karburantit, mund të konsumojnë gomat në mënyrë jo të njëtrajtshme dhe mund të bëjnë që vetura të lëvizë në mënyrë të paparashikueshme në situata kritike, si për shembull në lëvizjet e shmangieve kur është e ngarkuar plotësisht. Një shofer që nuk është shumë i aftë në perceptim mund të mos e ndjejë që ka diçka gabim me balancimin e rrotave. Rekomandojmë që të bëni balancimin çdo dy vjet, ose një herë në vit nëse bëni më shumë se 50 mijë kilometra.
Mund të siguroheni që vetura juaj të ketë jetë të gjatë dhe pa probleme edhe në shumë mënyra të tjera. Sigurisht që ia vlen të gjeni kavitetet dhe në pjesët e poshtme të veturës me agjentë kundër ndryshkut ose të kujdeseni për bojën. Masa të tjera profilaktike (si për shembull ndërrimi i sistemit të fazës më herët nga sa rekomandohet te plani i shërbimeve) mund të jenë gjithashtu specifike për modelin ose motorin e caktuar. Flisni me mekanikun dhe mos harroni që, njëlloj si me shëndetin, shpesh parandalimi është më i thjeshtë dhe kushton më pak sesa të zgjidhësh problemet që vijnë nga pakujdesia dhe neglizhenca.
