Veturat moderne janë ndërtuar dhe testuar që të punojnë mirë në kushte klimaterike të ndryshme, nga nxehtësia tropikale deri në ngricat e Arktikut. Sigurisht, me kusht që të kenë pajisjet e duhura dhe të mirëmbahen. Dimri po troket te dera, ndaj po ju tregojmë disa masa të thjeshta dhe jo të kushtueshme që ndihmojnë veturën tuaj të punojë mirë edhe në muajt e ftohtë të dimrit.
1. Vendosni goma dimri ose katër stinët
Nuk ka shumë ndryshim mes gomave të verës dhe të dimrit në rrugë të thatë ose të lagur. Në të vërtetë, gomat e verës performojnë po aq mirë ose edhe më mirë në dimër sesa gomat e dimrit. Por situata ndryshon shumë kur bie borë. Ndërkohë që gomat e verës bëhen thuajse krejt të pafuqishme, dhëmbëzimet specifike dhe përbërja e gomave të dimrit mund të ofrojë fuqi tërheqëse të mirë, stabilitet në drejtim dhe performancë në frenim edhe në borë. Gjithashtu mund të keni performancë të mirë edhe nga gomat katër stinët me cilësi të lartë, të cilat thjesht kombinojnë ndërtimin e gomave të verës me dhëmbëzimet e gomave të dimrit. Në vend të kombinimit të zakonshëm të M+S (Mud + Snow, ose “baltë + borë”), gomat e dimrit kanë të shënuar simbolin e ashtuquajtur Alpin me tre maja malesh dhe një flok bore, me shkurtimin 3PMSF (Three-Peak Mountain Snowflake, ose “flok bore në tre majat e maleve”).
Gomat ju tregojnë thuajse gjithçka që duhet të dini. Nëse dini si t’i lexoni shënimet e tyre
2. Kontrolloni gjendjen e baterisë së veturës
Si traditë që bëhet çdo vit, diçka që ndodh shpesh në mëngjesin e parë me ngricë është se shumë shoferë nuk nisen dot për në punë ngaqë i ka lënë bateria e veturës. Temperaturat nën zero janë një sfidë e madhe në përbërjen kimike të baterisë – me siguri e keni vërë re që edhe celularit i bie bateria më shpejt se zakonisht kur bëni një shëtitje në dimër. Shpesh, një bateri e dobët kuptohet që më përpara ngaqë motorinoja rrotullohet ngadalë. Mënyra më e thjeshtë për diagnostikim është matja e tensionit në pole duke përdorur një aparat matës. Nëse bateria është nën 12.4 V, karikojeni. Nëse dyshoni se gjendja e baterisë po përkeqësohet, rekomandojmë të shkoni në një servis, të cilët do të diagnostikojnë më me hollësi dhe saktësi gjendjen e baterisë. Në varësi të llojit të makinës dhe përdorimit të saj, një bateri e re duhet të zgjatë tre deri në pesë vjet.
3. Kontrolloni dhe rimbushni lëngjet e funksionimit të veturës
Gjëja e fundit që do të donit kur kripa në autostradë krijon një shtresë ngjyrë gri-të bardhë disi të tejdukshme në xhamin përpara është të merrni vesh që ju ka mbaruar solucioni larës i xhamave. Mbusheni që më përpara depozitën e larjes së xhamave me një solucion të përzier me antifriz. Këtë mund ta bleni para se të fillojë dimri në të gjitha dyqanet ku shiten aksesorë të veturave, në pika karburanti etj.
Antifrizi i motorit është zakonisht rezistent ndaj ngrirjes deri në -30 °C, dhe në veturat e reja rrallëherë ndodh që niveli të bjerë ndjeshëm midis intervaleve të servisit. Por meqë e keni ngritur kofanon për ta mbushur me solucion për larjen e xhamave, është ide e mirë të kontrolloni depozitën për të parë nëse niveli i antifrizit është midis shenjave Max dhe Min.
4. Ndërroni fshirëset e xhamave
Kur fshirëset e xhamave lënë njolla në xhamin përpara pas një shiu normal, atëherë ato do të lënë llucën e dimrit dhe kripa në rrugë do të lërë një shtresë balte në xhamin përpara. Nëse fshirëset nuk pastrojnë mirë dhe në mënyrë të njëtrajtshme, rekomandojmë që t’i ndërroni, edhe nëse nuk është shfaqur ende treguesi i konsumit (një ikonë me ngjyrë). Është një shpenzim i vogël që mund t’ju kursejë shumë telashe. Si zgjidhje e shpejtë, mund të provoni ta pastroni skajin e fshirëses së xhamave me një pecetë letre. Ndonjëherë shkaku i pastrimit jo të mirë është thjesht papastërtia e ngjitur.
5. Dritat ndezur?
Është bukur të kesh mundësi të shohësh mirë në errësirë dhe në borë. Është edhe më bukur kur të tjerët mund të të shohin në kohë dhe të mos të të ngatërrojnë me ndonjë skuter elektrik anash rrugës ngaqë të punon vetëm një nga dritat mbrapa.
Prandaj, merrni vetëm pak sekonda kohë për të bërë një xhiro anembanë makinës për t’u siguruar që të gjitha dritat janë në rregull.
Nëse edhe këto pak punë të thjeshta ju sjellin shumë bezdi, mund t’ua lini profesionistëve punën e përgatitjes për dimrin. Shumë servise të autorizuara dhe të pavarura ofrojnë kontrolle të lira para-sezonale, gjatë të cilave përqendrohen te frenat, pjesët e tjera të sforcuara të shasisë, që janë të ekspozuara ndaj papastërtive dhe lëndëve kimike në dimër. Gjithashtu ju rekomandojmë të aplikoni spërkatës kundër ndryshkut poshtë veturës, i cili ndihmon për të rritur jetëgjatësinë e pjesëve të rëndësishme të veturës që mbajnë peshë.
Dhe ngaqë përgatitja për dimrin nuk vlen vetëm për veturën, por edhe për shoferin, ejani dhe lexoni këshillat tona lidhur me udhëtimin në dimër:
Dimri është për ata që janë të përgatitur. Lexoni se si të drejtoni veturën në borë
