Një investim i mirë: 7 vetura befasuese që u është rritur çmimi

• Analistët e Carvago kanë identifikuar shtatë modele që sfidojnë trendet e tregut dhe kanë fituar vlerë gjatë tre viteve të fundit

• Në përzgjedhje, krahas veturave sportive Porsche, u përfshi befasishëm edhe një veturë familjare MPV apo një SUV me naftë që më parë anashkalohej

• Prapa rritjes së çmimeve qëndron kryesisht ndërprerja e prodhimit të motorëve të njohur me djegie të brendshme dhe shtrenjtimi i ndjeshëm i veturave të reja

• Të dhënat bazohen në analizën e tregut sekondar në 14 vende të BE-së

Të blesh një veturë, ta ngasësh për tre vjet dhe pastaj ta shesësh më shtrenjtë sesa ka kushtuar si e përdorur. A tingëllon kjo si një utopi për shoferët? Të dhënat nga tregu mbarë-evropian tregojnë se për modele specifike një skenar i tillë është i mundur. Ndërsa shumica e veturave humbasin dhjetëra për qind të vlerës në momentin e blerjes, analistët e kompanisë Carvago kanë identifikuar shtatë modele që i shpëtojnë këtij rregulli. Dhe nuk bëhet fjalë vetëm për super-vetura të paarritshme.

Tregu i automobilave ka kaluar një periudhë të trazuar, e cila ka rishkruar disa rregulla afatgjate mbi vlerat e mbetura. Kombinimi i ndërprerjes së prodhimit të motorëve me djegie, standardeve më të rrepta të emetimeve dhe pasojave të ndërprerjeve në zinxhirët e furnizimit ka krijuar një kategori specifike automjetesh. Bëhet fjalë për vetura që nuk mund të blihen më si të reja, ose pasardhësit e të cilave kanë humbur karakteristikat kryesore që klientët i donin.

“Rregulli i përgjithshëm thotë se vetura është investimi më i keq, sepse vetëm humbet vlerë. Megjithatë, analiza jonë e të dhënave nga miliona shpallje në të gjithë Evropën konfirmon se ka përjashtime. Nuk bëhet fjalë aspak vetëm për super-vetura koleksioniste që kushtojnë miliona, të cilat as nuk i kemi përfshirë në analizë. Në vlerë fitojnë edhe vetura ‘të zakonshme’, të cilat thjesht janë zhdukur nga oferta dhe u mungojnë familjeve apo të apasionuarve në treg,” shpjegon Dardan Nimani, Head of Carvagoby Gjirafa.

Në rritjen e çmimeve të veturave të përdorura ndikon edhe shtrenjtimi i automjeteve të reja, i cili funksionon si një spirancë çmimi. Nëse një model i ri shtrenjtohet nga një gjeneratë në tjetrën dhe në sallon kushton shuma të mëdha, kjo natyrshëm tërheq lart edhe çmimet e paraardhësve të tij të përdorur. Një veturë trevjeçare mund të shitet më pas në tregun e të përdorurave, për shembull, për 30,000 euro, pra për një shumë të ngjashme me atë sa ka kushtuar dikur si e re. Për blerësin kjo gjithsesi ka kuptim, sepse në optikën e listës së çmimeve të modelit të ri, ajo mbetet një alternativë dukshëm më e lirë.

Ja 7 modele befasuese që, sipas analizës së Carvago, janë rritur në çmim gjatë tre viteve të fundit:*

1. Porsche 718 Cayman GT4 (Rritja e çmimit: 14,3%) Kjo veturë është kënga e mjellmës e një epoke. Motori atmosferik me gjashtë cilindra prej 4.0 litrash me fuqi 310 kW (420 kf), karakteri me rrotullime të larta dhe orientimi purist e bëjnë atë një klasik të menjëhershëm. Me afrimin e kalimit të serisë 718 në lëvizje plotësisht elektrike, kërkesa për këtë xhevahir mekanik ka fluturuar lart.
2. Seat Alhambra 1.4 TSI (Rritja e çmimit: 11,2%) Ndoshta befasia më e madhe e listës. Ndërsa prodhuesit e veturave kanë kaluar masivisht në SUV, van-ët klasikë (MPV) praktikisht janë zhdukur. Alhambra me motor benzine 110 kW ofron hapësirë dhe ndryshueshmëri që SUV-të modernë shpesh nuk mund ta arrijnë. Familjet që refuzojnë kompromise në hapësirë kanë rritur çmimet e këtyre “mohikanëve të fundit”.
3. Suzuki Jimny 1.5 VVT (Rritja e çmimit: 6,9%) Një fuoristradë e vogël që u bë viktimë e suksesit të vet dhe normave të emetimeve. Në Evropë u tërhoq nga shitja në versionin e pasagjerëve dhe u rikthye e homologuar si automjet “komercial”. Versionet me katër ulëse të viteve 2020–2022 janë prandaj mall shumë i kërkuar. Dizajni i tij “kuti” dhe kalueshmëria e pakonkurrencë në terren e bëjnë atë një objekt kulti, vlera e të cilit nuk bie.
4. Porsche 911 Carrera S / 4S 992 (Rritja e çmimit: 5,6%) Gjenerata 992 me fuqi 332 kW (450 kf) konfirmon statusin e modelit 911 si porti më i sigurt në botën e veturave sportive. Edhe përkundër numrave më të lartë të prodhimit, kërkesa afatgjatë tejkalon ofertën. Në zhvillimin e çmimeve në tregun sekondar kanë ndikuar, ndër të tjera, afatet e gjata të dorëzimit të modeleve të reja 911 gjatë viteve të fundit.
5. Ford Edge 2.0 EcoBlue Bi-Turbo (Rritja e çmimit: 5,4%) Zhvillimi i çmimit të këtij SUV amerikan është një paradoks i përsosur. Si i ri, Edge depërtoi me vështirësi në Evropë dhe shitësit shpesh i hiqnin qafe veturat e magazinës vetëm me çmimin e zbritjeve masive. Megjithatë, situata ka ndryshuar. Pasi Ford përfundoi shitjen e modelit pa një zëvendësues, kjo veturë e anashkaluar më parë u bë në sytë e një grupi të caktuar klientësh një veturë e përdorur interesante, vlera e së cilës tani po rritet befasishëm.
6. Jeep Wrangler 2.0 T-GDI (Rritja e çmimit: 5,0%) Një histori e ngjashme si te Jimny. Ikoniku Wrangler me motor plotësisht benzinë po bëhet i rrallë, sepse marka në Evropë promovoi masivisht versionin plug-in hibrid 4xe. Fansat e teknikës klasike, që i frikësohen ndërlikimit të hibridëve në terren, janë të gatshëm të paguajnë ekstra për motorin turbo benzinë.
7. Toyota Land Cruiser 2.8 D-4D (Rritja e çmimit: 3,7%) Legjenda e besueshmërisë. Gjenerata J150 me motorin e modernizuar 150 kW ruan çmimin falë reputacionit të saj si makinë e pashkatërrueshme. Edhe pse ardhja e një gjenerate të re zakonisht ul çmimet e paraardhësit, në rastin e Land Cruiser vlen fakti që klientela konservatore vlerëson teknikën e provuar të modelit më të vjetër, gjë që frenon çdo rënie të çmimeve.

Megjithëse blerja e një veture nuk është primarisht një disiplinë investimi, të dhënat e Carvago tregojnë se zgjedhja e duhur e modelit mund t’u kursejë apo edhe t’u fitojë para shoferëve. Çelësi është njohja e detajuar e tregut dhe aftësia për të identifikuar trendet para se ato të bëhen çështje masive.

* Analiza bazohet në të dhënat e tregut sekondar në 14 vende evropiane, të cilat së bashku përfaqësojnë 87% të popullsisë së BE-së (Austri, Belgjikë, Republika Çeke, Francë, Gjermani, Itali, Luksemburg, Hungari, Holandë, Poloni, Rumani, Sllovaki, Spanjë dhe Suedi). Në krahasim u përfshinë veturat me vit prodhimi nga 2020 deri në 2022. Kemi krahasuar çmimet e këtyre modeleve specifike në tremujorin e parë të vitit 2023 me çmimet aktuale në tremujorin e katërt të vitit 2025 (mediana e çmimeve në të gjitha 14 tregjet). Përllogaritja ka punuar me konvertimin e monedhave lokale në euro sipas kursit të këmbimit të vlefshëm në periudhën përkatëse, pra Q1 2023 dhe Q4 2025. Modelet me shitje të gjurmuara në rendin e njësive për tremujor (zakonisht super-vetura) nuk janë përfshirë në pasqyrë.